屋里个桑树今年倒生得来得个兴，春天个辰光，日头里一晒，一粒一粒个桑籽就眼见仔俚变紫泛黑，赛过小灯笼一样荡勒叶爿里。
该棵桑树从我有记忆开始就勒海搿搭哉，是外公阿爹从隔壁桑园里扦过来个。
外婆讲原来伲住个房子对过有一只大桑园，是一户大人家顾夹里个。搿歇辰光太公太太就搭俚笃看桑园，实勒外公阿爹俚笃姊妹几个就勒桑园里长大个。
后首来碰着打仗，顾夹里一家门侪逃难出去哉，解放以后振亚厂收脱仔地皮当工人宿舍，桑树就朆挺几棵哉。
阿爹勒园子里种仔弗少树，桑树也是勒搿歇辰光扦过来个。后首来市政建设勒星，桑园侪推脱哉，只挺下来实梗一棵独苗苗。
树生勒园子里，正好勒伲搭隔壁乡邻房子个夹界头浪。作兴是迷信，也作兴是要想占地，前个几年俚笃翻建房子个辰光要想拿桑树截脱。
但也是俚命大，正好碰着市容市貌检查，隔壁个房子阿末点朆能起成功，桑树也就留仔一节根。但不过总归吃着个硬伤，连仔多年侪病秧秧个，叶子弗兴，桑籽也弗结。
老人家讲，桑通丧，桑树弗吉利，弗能种勒大门口个。但不过我查过歇点资料，其实骨仔老法头个文人，一脚是拿桑树代表女子、乡愁个。
中国人种桑养蚕有上千年个历史哉，传说里讲，黄帝个家小嫘祖发明仔养蚕宝宝个方法，搿勒有“嫘祖始蚕”个说法，俚也就拨奉为“先蚕”圣母。
勒苏州民间也有“祭蚕神”，拜“蚕花娘娘”个民俗。
因为古代养蚕纺丝一脚是妇女个主要生产活动，实勒，“桑树”勒早期个文学作品里，基本也就是女子个代名词。
《诗经·卫风·氓》里向就用桑个弗同阶段比喻女子个人生。“桑之未落，其叶沃若”讲个就是初生个嫩叶，颜色鲜亮，赛过女小娘儿个青春年少，婚姻幸福；而“桑之落矣，其黄而陨”讲个就是黄叶飘零，比喻女子容颜老去，婚姻破碎。
《诗经·小雅·隰桑》里也有“隰桑有阿，其叶有难，既见君子，其乐如何。”个句子，用繁茂个桑叶代指女小倌，表达看见初恋情人个辰光，快活，明媚个感情。
《诗经》里向林林总总，大约摸张要有廿篇侪写着过桑树，大多也侪是表示女子、快活，向往爱情的意象。
而也因为《诗·小雅·小弁》，桑树亦有仔另外一层含义——家乡。
“维桑与梓，必恭敬止。靡瞻匪父，靡依匪母。”
房子旁边个桑树搭仔梓树侪是爷娘种个，看见仔俚笃，要心怀敬意。
“桑梓”慢慢叫也就变成功仔家乡个代名词。勒外头漂泊个游子，看见桑树梓树，乡愁就会得浮上心头。
弗管是女子还是家乡，勒古典文学里，“桑”总归侪是一只比较美好个意象，有一种人文情怀囥勒里向。着实无不必要，因为一个同音字而截断根脉。
还好，度过仔最艰难个几年以后，桑树亦活转来哉。该个应该是今年春天最让人觉着快活的事体哉，连到仔偷偷伴伴吃桑籽的白头翁也看勒海入眼仔弗少。
文
予安
版
予安
图片来自网络
往期导读
花香玳玳
莼菜
江南水八仙
八月桂子香
今日曾阿当筷
再会黄梅天
菜饭
松花团子
炒肉馅团子
野菜
盐的魅力
粽子
酒酿饼
青团
蚕豆
明前螺
虾仁
三虾面
予安欢喜苏州话