原创杨忠明海上梦叠
作者：杨忠明
沪语改写：丁曙立
沪语讲述：金丽萍
文字修正、推荐：丁迪蒙
编辑：王乙其
黄梅时节，夜雨刚停，一夜好梦，拨几只白头翁个叫声吵醒。早浪起来，惊喜个看到今年种下去个牵牛花开了，浅红深紫，勒绿叶个衬托下头，带来了几丝清趣，楼下邻居个一棵凌霄花个藤蔓今年又爬上来了，窗门前头蒙上了一大片绿荫，凌霄花开个颜色是赭黄色个，陆放翁诗句里讲：“高花风坠赤玉盏，老蔓烟湿卷龙鳞。”搿个是上海老洋房常见个藤花，花开成片，拨夏天带来热情奔放个大能量，坊间传说迭个花有毒，只可以远远叫个观赏，勿能够忒过亲近。
早浪，一朵粉白色、碗口大个仙人球喇叭形个大花开了，仙人球浪长了一条条个棱，棱浪向长满了针刺，搿朵花就好像荷塘里个莲花，脱俗有禅意，搿只球种了十几年了，看牢仔伊慢慢叫个长大，三年前开始，每年夏天开始个辰光开花，早浪向开，到了夜到就谢脱了，比昙花开个辰光长一眼，俗话讲：“好花勿长开”，看来观赏此花真是要有眼缘分个。记得从前，我父亲养了一只仙人球，种勒勒一只天青瓷、张开仔大嘴巴个青蛙嘴巴里，有一日，开出一朵大黄花，好像老式留声机浪个大喇叭，看看也滑稽。
夏天式太阳邪气猛，紫薇花盛开，迭种树树皮光泽，花紫颜色，像纱、多皱裥，一朵朵个花，就好像是用薄个绸纱捏出来个，紫薇有白薇、红薇、翠薇之分，翠薇，紫色带蓝，有人讲，紫薇勿好用手去搔，一搔，枝叶摇动，好像人怕痒一样，坊间称伊为怕痒花。诗人为紫薇花吟诗，白居易个诗句：“独坐黄昏谁是伴，紫薇花对紫薇郎。”韩偓个诗句：“浅色晕成宫里锦，浓香染著洞中霞。”
我常庄会得去留心小区里自然生长个白颜色、粉颜色个野生牵牛花，花型虽然小，但邪气有灵气，小花清亮脱俗，叶子是小小、尖尖个三角形，搭家养牵牛花大大个心形个叶子勿一样，野生牵牛花生命力特别强大，每年四、五月份一场夜雨以后，花苗从拥挤个冬青灌木丛中顽强个穿出来，每年吃过端午粽子，野生牵牛花就开了，星星点点，拨夏天洒下一片小清心，别有一种淳朴搭飘逸勒眼中。我勒小区绿化带里洒了上百粒家养个牵牛花种籽，小苗刚刚出土个辰光，看看还蛮青翠个，最后竟然呒没一棵成活，说明一个问题，温室里长大个花是经勿起大自然个考验个，会得拨自然淘汰，年青人也是一样，勿到外头去艰苦锻炼，吃眼苦头，是呒没办法生存个。
夜快头，长花柄个茉莉花开了，花个颜色有黄、红、白、紫、粉，也有红黄相夹、红白混杂，伊有五角花瓣，微微叫带眼清香，勒吃夜饭个辰光开花，有人亲切个叫伊夜饭花，搿是记忆中石库门老弄堂里一种邪气接地气个夏日之花，根搭叶子可供药用，有清热解毒个功效。我更欢喜另外一种颜色鲜红个五角星花，茑萝松，旋花科一年生缠绕草本植物，原产地勒热带美洲。花色鲜红个居多，也有白色、粉色搭朱色，花个藤蔓细细软软个，五瓣头个花瓣，组成一个标准个五角星形状，伊极富攀援性，花搭叶子侪漂亮，拨人带来丰富个想象力，我感觉伊就好像格林童话里向个仙草，洋气、灵动。
夏天里赏花观叶有清心祛暑解烦个作用，养一盆花，七月里一直到十月份花开勿断，每日早浪向花开一片红，得侬带来一整日天个超好心情。
作者：杨忠明
讲述者：金丽萍
—————————————————
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。
沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。
沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》，少年儿童出版社
《囡囡学成语》，少年儿童出版社
原标题：《浅色晕成宫里锦》